Fendo historia

Somos fendo historia, mos cuaque u no somos embrecaus en un proceso de cambeo, en un punto d'inflexión, en un inte que ye o prencipe d'un mundo esferent. A muitos mos fería goyos veyer una virache enta un mundo mas social, mas ecolochico y mas chusto, de feito mos van a fer creyer que ixa ye a reyalidat pero o camin que s'ha encetau qui sabe quan, ye o pior camin ta la chusticia y ta l'individuo. Solo que cal veyer os politicos, as noticias, a carrera... iste no ye un proceso amagau ye de puertas bataleras, mos informan d'el y mesmo remataremos por votar-lo.

Huei huello en "El País" que "La banca alerta de un corte del crédito", si leyetz l'articlo plegaretz en a ideya de que ixe credito que se va a retallar afeutará prencipalment a las pymes (anque tamien diz que tas interpresas grans pero istas gosan d'haber mas capacidat de maniobra), cuala ye a radiz de l'articlo?, o Banco d'españa va a baxar o tiempo (de dica 5 añadas a 1 añada) que os bancos y caxas tienen ta retornar l'importe d'os creditos impagaus por as interpresas, dica agora cuan una empresa no podeba bosar o credito s'en teneban dentre 24 y 72 meses ta negociar una salida a ixe problema, agora solo que i habra 12 meses.

Cuan fablamos d'una interpresa gran probablement os bancos, caxas y ers mesmos, i metan tot o suyo empenyo en dar una salida "cordial" a ista afrenta pero ¿como se comportaran as mesmas entidatz de credito con os autonomos y as pymes? simplement no se comportaran porque direutament no daran os creditos a no ser que se "empenyen" os inmuebles de ditos autonomos y pymes.

Un país cuyo rete de pymes y autonomos ye amplo ye un país independient con prous fuerzas ta soportar as crisis, os empentons d'a globalizacion y o chuego d'os mercaus financieros, e ixo no i dentra en os plans d'a economía global, a mesma que creyo ista crisis y que no la rematara dica que cumpla os suyos plans.

Allora, cual ye ixe mundo esferent que fablaba entalto? ye un mundo sin d'oportunidatz t'o chicot empresario, ye un mundo globalizau que coloca en o tuyo salon un televisor 3D a cambio de treballar sin chistar, ye un mundo en o que a democracia sera a capacidat d'eslechir solo dentre as suyas opcions, ye un mundo en o que as ciencias sigan solo que "formacion t'a producir", un mundo sin presonas, solo que con "personal productivo", un mundo buedo anque la chent creiga que ye libre sin ser-lo, un mundo n'o que sin parar cuenta ya somos vivindo.